Një zjarr i përmasave të mëdha në një magazinë në zonën e Shkozetit ka shkaktuar vështirësi të shumta në qarkullim, duke bllokuar pjesërisht unazën e Durrësit në aksin Shkozet-Plepa.

Flakët e mëdha dhe tymi i dendur kanë përfshirë zonën përreth, duke bërë që lëvizja e automjeteve të vështirësohet ndjeshëm. Drejtuesit e mjeteve janë detyruar të lëvizin me kujdes për shkak të uljes së shikueshmërisë nga tymi.

Në vendngjarje kanë mbërritur 6 mjete zjarrfikëse dhe forca policie, të cilat po punojnë për izolimin dhe shuarjen e zjarrit. Flakët kanë rrezikuar edhe disa banesa pranë magazinës së përfshirë nga zjarri.

Sipas informacioneve paraprake, të pakonfirmuara zyrtarisht, dyshohet se zjarri mund të jetë shkaktuar nga këputja e dy kabllove të tensionit të lartë, si pasojë e temperaturave të larta, të cilat dyshohet se kanë rënë mbi objekt.

Si pasojë e ngjarjes, një pjesë e mirë e Durrësit ka mbetur pa energji elektrike, ndërsa autoritetet vijojnë ndërhyrjen për normalizimin e situatës.