Një incident me armë zjarri është regjistruar mbrëmjen e sotme në zonën e Himarës, ku dyshohet se nga një jaht në det, përballë Palasës, është qëlluar me armë zjarri në ajër.

Sipas informacionit paraprak të Policisë, ngjarja është konstatuar rreth orës 21:00, ndërsa pas marrjes së njoftimit janë angazhuar menjëherë shërbimet e Policisë Kufitare dhe Njësisë Policore Detare, të cilat janë vënë në ndjekje të mjetit lundrues.

Paralelisht, shërbimet e Komisariatit të Policisë Himarë dhe Stacionit të Policisë Dhërmi kanë nisur kontrollet nga toka përgjatë vijës bregdetare, me qëllim verifikimin e informacionit dhe identifikimin e personave të përfshirë.

Policia bën me dije se vijon ndjekja e jahtit dhe veprimet hetimore për dokumentimin e plotë të ngjarjes.

Në përfundim të operacionit për ndalimin e mjetit lundrues dhe kryerjen e veprimeve të para hetimore, autoritetet pritet të japin informacion më të detajuar mbi rrethanat e incidentit.