Pas disa javësh kërkimesh, strukturat operacionale të specializuara të Policisë së Shtetit, në bashkëpunim me Byronë Kombëtare të Hetimit, kanë arrestuar sot shtetasin Ergys Agasi.

Arrestimi u krye më 26 gusht 2026, në hyrjen jugore të qytetit të Durrësit, në zonën e Plepave, në autostradë. Në momentin e arrestimit, sipas SPAK, Agasi shoqërohej nga shtetasi U. Sh., ish-punonjës policie, i cili është arrestuar në flagrancë për veprën penale “Përkrahja e autorit të krimit”, parashikuar nga neni 302/2 i Kodit Penal.

Prokuroria e Posaçme kundër Korrupsionit dhe Krimit të Organizuar njofton se vijon hetimet për procedimin penal nr. 20/1 të vitit 2025. Në këtë procedim, më 5 dhjetor 2025, është regjistruar edhe emri i shtetasit Ergys Agasi.

Ai po hetohet për një sërë veprash penale, mes tyre “Konkurrenca e paligjshme nëpërmjet dhunës”, “Heqja e paligjshme e lirisë”, “Shkelja e barazisë së pjesëmarrësve në tendera apo ankande publike”, të kryera në formën e veçantë të bashkëpunimit, atë të grupit të strukturuar kriminal.

Gjithashtu, Agasi po hetohet edhe për “Grup të strukturuar kriminal”, “Kryerje të veprave penale nga organizata kriminale dhe grupi i strukturuar kriminal”, “Pastrim të produkteve të veprës penale ose veprimtarisë kriminale”, si dhe “Korrupsion aktiv të personave që ushtrojnë funksione publike”, të kryer në bashkëpunim dhe më shumë se një herë.

Sipas SPAK, ndaj Ergys Agasit, me vendimin nr. 125, datë 15 dhjetor 2025, të Gjykatës së Posaçme të Shkallës së Parë për Korrupsionin dhe Krimin e Organizuar, ishte caktuar masa e sigurisë “arrest në burg”. Vendimi i gjykatës i ishte dërguar menjëherë për ekzekutim strukturave të Policisë së Shtetit më 17 dhjetor 2025.

SPAK falënderoi Policinë e Shtetit për kryerjen me sukses të operacionit.

Çdo person prezumohet i pafajshëm deri në momentin kur fajësia e tij provohet me vendim gjyqësor të formës së prerë.