39-vjeçarja Kumrie Zika, e njohur publikisht edhe nga daljet televizive si “eksperte punësimi”, është arrestuar sërish nga Policia e Tiranës, e dyshuar për një seri vjedhjesh në biznese.

Sipas të dhënave të hetimit, Zika dyshohet se përdorte një skemë të përsëritur: punësohej në biznese të ndryshme dhe më pas përfitonte nga momentet kur mbetej vetëm për të marrë paratë e xhiros ditore.

Arrestimi u krye nga strukturat e Komisariateve Nr. 1 dhe Nr. 2, në bashkëpunim me Forcën e Posaçme “Shqiponja”, pas hetimeve për disa vjedhje të regjistruara në Tiranë.

Një prej rasteve të mëparshme lidhet me një pikë këmbimi valutor dhe transferte parash në zonën e “Varrit të Bamit”. Zika ishte punësuar aty dhe ndodhej në ditën e parë të punës, kur dyshohet se përfitoi nga largimi për pak çaste i punonjësit që e shoqëronte dhe mori rreth 5 mijë euro nga arka.

Një tjetër rast i atribuohet asaj më 5 gusht në Vlorë, ku dyshohet se ka vjedhur një shumë të konsiderueshme parash në një pikë këmbimi valutor.

Sipas Policisë, rasti i fundit lidhet me vjedhjen e xhirove ditore të pesë bizneseve në territoret e Komisariateve Nr. 1 dhe Nr. 2.

Pas denoncimit të një prej bizneseve, efektivët e identifikuan dhe e arrestuan 39-vjeçaren në zonën e “21 Dhjetorit”.

Kumrie Zika është bërë e njohur edhe për shkak të daljeve të mëparshme televizive si “eksperte punësimi” dhe opinioniste për tregun e punës dhe të drejtat e punonjësve, ndërsa gjatë muajve të fundit emri i saj është lidhur me disa raste të dyshuara vjedhjesh.

Akuzat ndaj saj mbeten objekt i procedimit penal dhe Zika prezumohet e pafajshme deri në një vendim të formës së prerë.