Gazetarja Klodiana Lala, e cila u akuzua sot paradite nga ish-drejtuesja e SHISH Vlora Hyseni, në dyert e GJKKO, për lidhje me agjenturën serbe, reagoi për herë të parë në darlë në emisionin Opinion. Lala u shpreh se e përbuz sulmin e Vlora Hysenit, dhe e quajti shpifje banale.

Gazetarja që ka mbuluar çështjen e drejtueses së SHISH dhe procesin e saj shtoi se deklarata e Hysenit ishte shantazh për shumë të tjerë.
Lala tha se ka bërë sot kallëzim në SPAK ndaj Vlora Hysenit, për kërcënim për shkak të detyrës dhe vënie në rrezik të jetës së saj dhe familjarëve të saj.

Gazetarja që mbulon drejtësinë u shpreh se do t’i shkojë deri në fund procesit pendal ndaj zonës Hyseni dhe se për shantazhin që i kishte bërë sot, do të duhej të ishte mbyllur në qeli.

Sipas saj, skandali i madh është se çfarë ka bërë ish-drejtuesja e SHISH me informacionet sekrete, si i ka shpërndarë ato tek grupimet kriminale.

Vlora Hyseni u paraqit sot para Gjykatës së Posaçme kundër Krimit dhe Korrupsionit, për t’u njohur me masën e sigurisë, arrest shtëpie. Teksa po futej në gjykatë, gazetarja Lala e pyeti se çfarë lidhje kishte ajo me Ergys Agasin.

E pandehura reagoi me nervozizëm, duke i thënë se gazetarja kishte lidhje me agjenturën serbe dhe foli për takime në Hotel Rogner.
Pas këtij sulmi ka pasur një reagim masiv publik që dënonte këtë deklaratë të Hysenit, dhe ka pasur një solidarizim po masiv me gazetaren Klodiana Lala.