Debat me tone ironike dhe replika të forta u zhvillua në Komisionin e Ligjeve mes kryetarit Ulsi Manja dhe deputetit të opozitës Saimir Korreshi, gjatë diskutimeve për rendin e ditës dhe propozimet lidhur me hartën administrative.

Korreshi kundërshtoi mënyrën e zhvillimit të diskutimeve dhe kërkoi që në rendin e ditës të përfshihej edhe nisma e opozitës, duke argumentuar se ajo është hartuar pas konsultimeve me ekspertë dhe qytetarë.

Në replikat mes tyre nuk munguan batutat, me Korreshin që ironizoi praninë e kamerave.

Korreshi: “Faleminderit kryetar! Për të dalë në TV po e bëjmë këtë punë?”

Manja: “Po të përgjigjem direkt. Është seanca që dilet në TV.”

Korreshi: “E paske vënë kamerën që të dalësh mirë.”

Manja: “Kur flet ti, nuk dal unë.”

Korreshi: “Shyqyr që paskam krehur edhe flokët sot.”

Më pas, Korreshi u ndal te rendi i ditës dhe kërkoi që të merrej në shqyrtim edhe propozimi i opozitës për hartën administrative.

“Sa i përket rendit, mund të ndryshohet. Nuk është kalendari i Vitit të Ri që shkrepet një herë. Nuk është e vërtetë që nuk kemi qenë, siç thoni ju. Kemi qenë të pranishëm, si i kemi hartuar ne 401 faqe? Nuk është byrek që e fut në furrë dhe e nxjerr. Është punuar seriozisht”, tha Korreshi.

Ai vijoi me kritika ndaj mazhorancës, duke iu referuar edhe mënyrës së miratimit të nismave të tjera ligjore.

“Na e bëtë si ligji i gjyqtarëve, që erdhi tjetër për tjetër dhe u miratuan ato për shpëlarje, pa firma fare”, u shpreh Korreshi.

Deputeti tha se opozita ka dalë në përfundimin që harta administrative duhet të ketë 100 njësi, duke pretenduar se ky propozim është hartuar pas konsultimeve me ekspertë.

“Ne e kemi me 100, sepse në këtë përfundim kemi dalë, kemi folur me ekspertët më të mirë. Bëjmë dëgjesën me qytetarët, asnjë nuk e donte këtë hartë me 46 bashki dhe askush nuk e donte. Ju prapë doni ta votoni. Kemi depozituar nismën ligjore”, tha ai.

Korreshi ngriti gjithashtu shqetësime për shërbimet në njësitë administrative dhe vështirësitë e qytetarëve për të marrë shërbime.

“Ju nuk keni as shërbim urban, do rrinë qytetarët nga dy orë të presin. Dëgjojeni edhe propozimin tonë se nuk po themi të kthehemi te opingat. Nuk ka më zgjedhje nëpër njësi se janë të gjithë të emëruar ata”, deklaroi deputeti.

Ai shtoi se numri i punonjësve në administratë, sipas tij, nuk është ulur.

“Thanë se do ulin numrin e punonjësve dhe e kanë rritur. Po të shkosh dhe t’i hysh shërbimit nëpër njësi, bën një denoncim dhe shkojnë me vrap të heqin plehrat”, tha Korreshi.

Deputeti vijoi kritikat ndaj drejtuesve vendorë.

“Unë pres qafën nëse kryetarët e bashkive i kanë shkelur ndonjëherë rrugët nëpër fshatra. Nuk merret kryetari i bashkisë me gardhet”, tha ai.

Manja ndërhyri: “Gardhi nuk është në çështjet e diskutimit sot.”

Korreshi iu përgjigj: “Unë fshatar jam, merrem dhe me gardhin.”

Në fund, debati u rikthye te batutat mes dy deputetëve.

“Propozimi final i imi, bazuar edhe në nenin 31. Fike mikrofonin tënd, të dal unë në TV, se jam më i bukur se ti”, tha Korreshi.

“Vazhdo, nuk ka problem”, iu përgjigj Manja.

Korreshi kërkoi më pas ndryshimin e rendit të ditës dhe përfshirjen e propozimit të Partisë Demokratike.

“Të ndryshohet rendi i ditës, i nderuar kryetar, meqë edhe Baromi i hapi derën sigurisë kombëtare, i fortifikuam muret, të fusim edhe propozimin e PD-së, meqë kemi edhe këta miqtë nga qytetet, që të shkojnë nëpër punë, të pastrojnë rrugët, të bëjnë ndonjë punë. Se harxhojnë edhe naftë, e ke çuar 200 lekë”, përfundoi Korreshi.