Një aksident i rëndë me dy viktima ka ndodhur në rrugën e Kombit, segmenti Milot-Rrëshen, në afërsi të fshatit Rubik, pas përplasjes së dy automjeteve.

Si pasojë e aksidentit ka humbur jetën drejtuesi i njërit prej automjeteve dhe pasagjeri në mjetin tjetër, ndërsa kanë mbetur të plagosur rëndë 5 të tjerë.

Mësohet se 5 të plagosurit janë nisur me urgjencë drejt Spitalit të Traumës.

Policia dhe grupi hetimor ndodhen në vendin e ngjarjes dhe po punojnë për zbardhjen e plotë të shkaqeve të aksidentit.

“Në Rrugën e Kombit, në segmentin Rrëshen–Milot, automjeti me drejtues shtetasin N. P., 61 vjeç, është përplasur me automjetin me drejtues shtetasin D. P., 30 vjeç.

Si pasojë e aksidentit kanë ndërruar jetë drejtuesi i njërit prej automjeteve shtetasi N. P., si dhe shtetasi F. P., rreth 57 vjeç (babai i shtetasit D. P.)

Gjithashtu, janë dëmtuar drejtuesi i automjetit tjetër, shtetasi D. P., si dhe 4 pasagjerë, të cilët janë transportuar në Spitalin e Traumës, në Tiranë, për ndihmë mjekësore“, njofton policia.