Agjencia e Mbikëqyrjes Policore (AMP) ka goditur një aktivitet të dyshuar të paligjshëm në fushën e lojërave të fatit dhe basteve sportive, në kuadër të operacionit të koduar “Basti i Fundit”.

Bazuar në informacionet e siguruara nga strukturat e Inteligjencës Operative, AMP ushtroi kontroll në ambientet e një bar-kafeje në pronësi të shtetasit me iniciale A.S., në zonën e njohur si “Tregu Fshatar”, pranë Fushë-Krujës.

Gjatë kontrollit, në cilësinë e provës materiale u sekuestruan:

• 4 pajisje kompjuterike të dyshuara se përdoreshin për lojëra të fatit të paligjshme;
• 4 monitorë;
• pajisje serverike dhe elemente të tjera teknologjike që dyshohet se shërbenin për organizimin e basteve sportive të paligjshme.

AMP bën me dije se hetimet po vijojnë për dokumentimin e plotë të aktivitetit, identifikimin e personave të përfshirë, si dhe verifikimin e çdo rasti të mundshëm favorizimi, mosveprimi apo përfshirjeje nga punonjës të Policisë së Shtetit ose subjekte të tjera që janë në fushën e mbikëqyrjes së Agjencisë.

Sipas AMP-së, operacioni synon vendosjen përpara përgjegjësisë ligjore të çdo personi të përfshirë në këtë veprimtari të dyshuar të paligjshme.