Astronautët e misionit Artemis II të NASA-s e përmbyllën me një rekord historik misionin e tyre drejt Hënës duke udhëtuar më larg nga Toka se çdokush tjetër, e tashmë kanë nisur kthimin.

Anija kozmike Orion arriti një distancë maksimale prej rreth mbi 400 mijë kilometrash nga planeti ynë, duke tejkaluar kështu rekordin e Apollo 13 të vitit 1970.

Gjatë misionit, katër astronautët- Reid Wiseman, Victor Glover, Christina Koch dhe kanadezi Jeremy Hansen-vëzhguan anën e largët të Hënës dhe dëshmuan një eklips diellor të dukshëm vetëm nga hapësira.

Orion gjithashtu realizoi afrimin më të afërt me Hënën, duke kaluar vetëm 4.067 milje (6.545 kilometra) mbi sipërfaqe përpara se të fillonte trajektoren e kthimit.

Presidenti amerikan, Donald Trump, foli drejtpërdrejt me ekuipazhin, duke lavdëruar misionin dhe planet për eksplorime të mëtejshme.

“Njerëzit nuk kanë qenë atje prej një kohe të gjatë… por kjo do të bëhet gjithnjë e më i përhapur sepse do të realizojmë shumë udhëtime. Në fund, astronautët do të bëjnë udhëtimin e madh për në Mars. Misioni juaj hap rrugën për kthimin e Amerikës në sipërfaqen hënore shumë shpejt”, tha Trump.

Komandanti Reid Wiseman e cilësoi mesazhin e Trumpit si “shumë të veçantë për të gjithë ata”.

“Ne pamë gjëra që asnjë njeri nuk i ka parë ndonjëherë, madje as ekuipazhi i Apollo-s, dhe kjo ishte e mahnitshme”, u shpreh ai, teksa përshkroi momentin kur ekuipazhi prej katër anëtarësh dëshmoi nga hapësira eklipsin diellor, ndërsa iu referua gjasave për aventurave të ardhshme drejt Marsit.