Kini kujdes nëse udhëtoni sot në autostradën Tiranë–Durrës. Nga ish-Sheshi Shqiponja deri te nënkalimi i Limuthit nisin punimet e reja, dhe një nga korsitë do të devijohet përkohësisht.

Projekti parashikon ndërtimin e mbikalimeve për këmbësorët, gjelbërimin e segmentit, ndriçimin rrugor dhe rishtrimin e asfaltit deri në pikën ku lidhet me autostradën e re. Gjatë punimeve, makinat do të vazhdojnë të qarkullojnë në korsitë e tjera.

Njoftimi i plotë i ARRSH-së:

“Autoriteti Rrugor Shqiptar vijon zbatimin e projektit ‘Plotësimi i punimeve dhe përmirësimi estetik nga Sheshi Shqiponja deri te nënkalimi i Limuthit’, i cili synon plotësimin e elementeve infrastrukturore dhe përmirësimin estetik të këtij aksi rrugor.

Në kuadër të këtij projekti, duke filluar nga data 13.11.2026, do të nisin punimet e parashikuara, të cilat përfshijnë ndërtimin e mbikalimeve për këmbësorët, gjelbërimin e segmentit rrugor, realizimin e sistemit të ndriçimit rrugor, si dhe përmirësimin e shtresave asfaltike në segmentin nga Sheshi Shqiponja deri në pikën e lidhjes me autostradën e re. Gjithashtu, do të realizohen edhe punime të tjera të parashikuara në projekt.

Gjatë zhvillimit të punimeve, në zbatim të planit të menaxhimit të trafikut, do të bëhet devijimi i përkohshëm i njërës prej korsive të qarkullimit, duke garantuar vijimësinë e lëvizjes së mjeteve në korsitë e tjera të disponueshme.

Kontraktori ka marrë masat e nevojshme për organizimin e trafikut, vendosjen e sinjalistikës së përkohshme dhe zbatimin e të gjitha masave të sigurisë rrugore, me qëllim garantimin e sigurisë së përdoruesve të rrugës dhe të personelit në kantier.

Kërkojmë mirëkuptimin e drejtuesve të mjeteve gjatë zhvillimit të punimeve, si dhe respektimin e sinjalistikës së përkohshme dhe udhëzimeve të punonjësve në terren.”