Drejtori i Përgjithshëm i Agjencisë së Mbikëqyrjes Policore (AMP), Klevis Qose, zhvilloi një takim me përfaqësuesen e programit ICITAP për Evropën dhe Azinë, Alexzandria Burns, si dhe me Atasheun për Asistencën në Çështjet e Zbatimit të Ligjit pranë Ambasadës së Shteteve të Bashkuara në Tiranë, Richard Deasy.

Gjatë takimit u diskutua mbi sfidat aktuale në trajtimin e rasteve komplekse, si edhe mbi ecurinë e projekteve të përbashkëta, në përputhje me objektivat e Departamentit Amerikan të Drejtësisë.

Drejtori Qose shprehu mirënjohjen për mbështetjen e vazhdueshme që programi ICITAP dhe partnerët amerikanë kanë dhënë në forcimin e kapaciteteve profesionale dhe teknike të AMP-së.

Nga ana e tyre, përfaqësuesit e ICITAP vlerësuan rezultatet e bashkëpunimit me AMP-në dhe rikonfirmuan angazhimin për vijimin e projekteve të përbashkëta, me fokus konsolidimin e standardeve të mbikëqyrjes dhe rritjen e besimit të qytetarëve ndaj institucioneve.