Një incident i rëndë ka ndodhur në Modena të Italisë, ku një makinë me shpejtësi të lartë ka goditur një turmë këmbësorësh në zonën e qarkullimit të kufizuar të mjeteve.

Salim el Koudri, 31-vjeçari italian me origjinë marokene, i lindur në Bergamo dhe banor i provincës së Modenës, është arrestuar. Ai nuk kishte precedentë penalë, teksa sipas mediave italiane veproi “nga pakënaqësia sepse ndihej i ngacmuar”.

Rreth shtatë persona u plagosën, dy prej të cilëve në gjendje të rëndë. Një gruaje mund t’i duhet të priten të dyja këmbët. Makina gjithashtu u përplas edhe me një vitrinë dyqani dhe një biçikletë, teksa mbeti e bllokuar në trotuar.

Autori është larguar në këmbë, teksa po largohej nxori thikën dhe sulmoi një kalimtar, por u ndalua nga qytetarët.

Karabinierët, policia lokale dhe helikopterë emergjence nga Bolonja dhe Pavullo mbërritën në vendngjarje. Kryebashkiaku Mezzetti falënderoi qytetarët që ndaluan shoferin, duke parandaluar një tragjedi më të madhe.

Terrorizmi është përjashtuar dhe ngjarja po hetohet si një akt kriminal individual. Kryeministrja Giorgia Meloni dhe Ministri i Brendshëm Matteo Piantedosi po ndjekin situatën nga afër.

Dëshmitarët treguan se makina po ecte me të paktën 160 km/orë dhe njerëzit fluturonin nga përplasjet.