Një reagim i Flamur Noka në rrjetet sociale ka ndezur debat politik dhe mediatik, pas intervistës së Alesia Balliu në emisionin Top Story, të moderuar nga Grida Duma.

Gjatë lidhjes direkte në studio, Balliu është pyetur në lidhje me mospranimin e kandidimit të saj në zgjedhjet për kryetarin e Partisë Demokratike, një çështje që prej ditësh ka sjellë diskutime dhe reagime në kampin opozitar dhe në rrjetet sociale.

Pas transmetimit të intervistës, Noka publikoi një mesazh ironik në rrjetet sociale, ku shkruante:

“Mund të na thonë mediat varikarlon dhe patronazhistët e rrjeteve sociale, se ç’lidhje ka me #PD kjo Zegjineja 2.0 e Shqipëria Bëhet?”

Postimi u shpërnda menjëherë dhe u interpretua nga ndjekësit si një thumbim i drejtpërdrejtë ndaj debatit të zhvilluar në studio, si edhe ndaj figurave të përfshira në të.

Kujtojmë se Alesia Balliu ka qenë në qendër të vëmendjes pas pretendimeve dhe diskutimeve për mospranimin e kandidimit të saj në garën për drejtimin e Partisë Demokratike. Çështja ka nxitur reagime të ndryshme në opinionin publik, ndërsa në rrjetet sociale janë shtuar komentet mbi procesin dhe mënyrën se si po menaxhohen kandidaturat brenda PD-së.

Reagimi i Nokës vjen në një moment kur debatet brenda dhe rreth Partisë Demokratike vijojnë të mbeten në fokus të diskutimeve politike dhe mediatike.