Gjykata e Posaçme Kundër Korrupsionit dhe Krimit të Organizuar (GJKKO) ka liruar nga burgu ish-zëvendësministrin e Shëndetësisë, Klodian Rrjepaj dhe biznesmenin Ilir Rrapajn.

Ata ndodheshin në burg që prej gushtit të vitit 2023 për aferën e Sterilizimit.

Vendimi u dha me shuarje dënimi, sepse sipas llogarive, rezultoi se iu ka përfunduar koha e dënimit me mbajtjen në paraburgim.

Ata ishin dënuar me nga 6 vite burg për veprat penale “vjedhje duke shpërdoruar detyrën” dhe “falsifikim dokumentesh”. Megjithatë, për shkak të gjykimit të shkurtuar, dënimi iu ul në 4 vite për secilin.

Kujtojmë se për këtë aferë i pandehur është edhe ish-ministri Ilir Beqaj, por çështja e tij është e ndarë dhe po gjykohet veçmas.