Pas mbrëmjeve si ajo kundër Galatasaray është më e vështirë të ringrihesh. Dhimbja e humbjes dhe eliminimit e bashkuar me vetëdijen se iu afrua shumë përmbysejes së madhe duke pësuar edhe një tjetër padrejtësi, ishin një goditje e rëndë për Juventustin, për futbollistët dhe Luciano Spallettin.

Trajneri bardhezi ishte kaq i shtrydhyr sa nuk ia doli të flasë me gazetarët pas ndeshjes, deshi t’ia lërë kohën dhe hapësirën skuadrës që çdokush të gjejë mënyrën për të kthyer faqe.

Ditën e enjte, stërvitje për shkarkimin e energjisë ndërsa këtë të premte lojtarët janë pushim përpara se të kthehen në stërvitje të shtunën në prag të ndeshjes së madhe me Romën. Një ndeshje që do të vlejë shumë përsa i përket çështjes së kualifikimit në Ligën e Kampioneve, një ndeshje ku steka do të vendoset sërish lart sic u bë ndaj skuadrës turke.

Në dhomat e zhveshjes, pas ndeshjes me Galatasaray, ky ishte mesazhi që kishte dhënë kapiteni Locatelli dhe më pas edhe trajneri Spalletti bëri të tijën. Dhe duke qëndruar te Spalletti, trajneri toskan është i bindur se ka nën urdhrat e tij një grup të fortë, që pavarësisht ndryshimet që do të duhen të bëhen në merkaton e muajve të vertës, është në gjendje që të arrijë mes 4 më të mirave në Serie A. Ai, ashtu sikurse edhe lojtarët, duhet të marrin më të mirën nga ajo që bënë të mërkuren me bindjen se duke larguar naivitetin dhe pasigurite, e ardhmja është më shumë e bukur sesa e vështirë.