Komisioni Parlamentar për Çështjet Ligjore pritet të nisë të hënën shqyrtimin e ndarjes së re administrative-territoriale, sipas variantit të propozuar nga Partia Socialiste.

Drafti i mazhorancës parashikon reduktimin e numrit të bashkive nga 61 në 46, duke bërë që 15 bashki të humbasin statusin si njësi të pavarura dhe t’u bashkohen bashkive fqinje.

Nisma është depozituar në Kuvend më 31 korrik dhe ndërkohë janë zhvilluar konsultime me njësitë vendore dhe qytetarët.

Për miratimin e hartës së re nevojiten të paktën 84 vota në Kuvend. Pikërisht sigurimi i tyre pritet të jetë një nga sfidat e mazhorancës, pasi ndryshimet kanë shkaktuar pakënaqësi edhe brenda radhëve socialiste.

Në disa prej 15 bashkive që rrezikojnë të humbasin statusin, këshilltarë të majtë dhe të djathtë janë bashkuar kundër ndryshimit të hartës, por pa arritur ta ndalin procesin.

Votimi në Kuvend parashikohet për 8 tetor, pas rreth tre javësh shqyrtime parlamentare.

Kjo do të ishte hera e dytë gjatë qeverisjes së Edi Ramës që Shqipëria ndryshon ndarjen administrative-territoriale, pas reformës së vitit 2014.

Edhe këtë herë palët mbeten larg konsensusit. Partia Socialiste propozon 46 bashki, ndërsa opozita kërkon rreth 100 njësi vendore.