Një pilot shqiptar është ndaluar në Francë pasi fluturoi me një avion të lehtë mbi centralin bërthamor të Penly, në rajonin e Normandisë, në një lartësi më të ulët se ajo e lejuar për këtë zonë të ndjeshme.
Sipas gazetës franceze Le Journal du Dimanche (JDD), personi i ndaluar dyshohet se është Ermal Beqiraj, biznesmeni shqiptar i shpallur në kërkim nga SPAK në kuadër të hetimeve për dosjen e Agjencisë Kombëtare të Shoqërisë së Informacionit (AKSHI). Deri në këtë moment nuk ka një konfirmim zyrtar nga autoritetet franceze apo shqiptare për identitetin e tij.
Sipas JDD, incidenti ndodhi të shtunën, kur avioni civil fluturoi mbi centralin bërthamor të Penly duke zbritur nën kufirin minimal të lejuar të fluturimit. Pas sinjalizimit, Forcat Ajrore Franceze shoqëruan avionin deri në aeroportin e Albert, ku piloti u ndalua nga policia për t’u marrë në pyetje.
Gazeta franceze raporton se gjatë kontrollit fizik policia gjeti tre pajisje AirTag, ndërsa përgjigjet e pilotit dhe itinerari i fluturimit kanë ngritur dyshime te hetuesit. Sipas të njëjtit burim, ai deklaroi se ulja e lartësisë kishte qenë e paqëllimshme dhe se në atë moment ishte duke folur në telefon me nënën e tij.
JDD shkruan se piloti u gjobit për shkeljen e rregullave të fluturimit dhe se çështja iu referua më pas strukturave franceze të specializuara për hetimin e krimit të organizuar. Megjithatë, deri tani autoritetet franceze nuk kanë bërë publike akuza për spiunazh dhe nuk kanë konfirmuar zyrtarisht identitetin e personit të ndaluar.
Nga ana tjetër, është fakt i konfirmuar se Ermal Beqiraj është shpallur në kërkim nga Prokuroria e Posaçme (SPAK) në dosjen e njohur si skandali i tenderëve të AKSHI-t. Sipas SPAK, ndaj tij janë ngritur akuza që lidhen me korrupsionin, manipulimin e procedurave të prokurimit publik, pastrimin e parave dhe pjesëmarrjen në grup të strukturuar kriminal.
Deri në publikimin e një reagimi zyrtar nga autoritetet franceze ose shqiptare, lidhja mes pilotit të ndaluar dhe biznesmenit Ermal Beqiraj mbetet informacion i raportuar nga media franceze Le Journal du Dimanche, pa konfirmim zyrtar nga institucionet përgjegjëse.