Sipas një artikulli të publikuar sot nga media greke Greek City Times, kompania e lidhur me biznesmenin amerikan Jared Kushner po përgatitet të tërhiqet nga projekti i shumëpërfolur turistik në ishullin e Sazanit. Media citon burime të Gazeta Journal, sipas të cilave investitorët po shqyrtojnë alternativa të tjera në rajon, ndërsa Greqia thuhet se ka ofruar kushte të favorshme për zhvillime luksoze në Mykonos.

Artikulli pretendon se projekti në Sazan është përballur me kundërshtime të forta publike, shqetësime mjedisore dhe hetime në Shqipëri, faktorë që mund të kenë ndikuar në rishikimin e planeve të investimit. Megjithatë, deri tani nuk ka një konfirmim zyrtar nga kompania e Kushner për një tërheqje përfundimtare nga projekti.

Lajmi vjen në një kohë kur projekti i Sazanit dhe ai në Zvërnec kanë nxitur protesta dhe debat të gjerë publik në Shqipëri. Ndërkohë, raportime të tjera të ditëve të fundit tregojnë se autoritetet shqiptare po vazhdojnë procedurat për zhvillimin e projektit në Sazan, çka krijon paqartësi mbi të ardhmen e investimit.