Papa Leoni XIV është nisur nga Roma drejt Amerikës Latine, në udhëtimin e tij të gjashtë apostolik, i cili do të përfshijë Uruguain, Argjentinën dhe Perunë.

Pas rreth 13 orësh e gjysmë fluturimi, Papa pritet të mbërrijë në Montevideo, kryeqytetin e Uruguait. Para nisjes, ai përshëndeti autoritetet dhe zyrtarët e pranishëm në aeroport. Gjatë fluturimit mbi territorin italian, Leoni XIV i dërgoi një telegram Presidentit Sergio Mattarella, ku përcolli një mesazh paqeje dhe vëllazërie për popujt që do të vizitojë, si dhe përshëndetjet e tij për kombin italian.

Qëndrimi në Uruguai do të zgjasë deri më 8 nëntor. Sipas programit të publikuar nga Vatican News, Papa do të zhvillojë takime me Presidentin Yamandú Orsi, përfaqësues të autoriteteve, shoqërisë civile dhe trupit diplomatik. Në axhendë janë gjithashtu aktivitete fetare dhe takime me përfaqësues të arsimit dhe komuniteteve lokale.

Më 8 nëntor, Leoni XIV do të udhëtojë drejt Buenos Airesit, në Argjentinë, ku do të takohet me përfaqësues të institucioneve, botës së punës dhe të rinjtë.

Ndalesa e tretë do të jetë Peruja. Më 11 nëntor, Ati i Shenjtë do të niset drejt këtij vendi, ku do të vizitojë Limën, Çiklajon, Kuskon dhe Pukalpën. Një pjesë e programit do t’u kushtohet komuniteteve të Amazonës dhe besimtarëve.

Udhëtimi apostolik i Papës do të përfundojë më 17 nëntor, datë kur është planifikuar kthimi i tij në Romë.