Real Madrid duket se është rikthyer sërish në kërkim të Massimiliano Allegrit. Klubi madrilen pritet të tentojë për herë të tretë të bindë trajnerin italian të transferohet në kryeqytetin spanjoll, pas refuzimeve që mori në vitet 2019 dhe 2021.

Sipas raportimeve nga Italia, Allegri aktualisht ndihet mirë te Milani dhe është në harmoni me projektin dhe drejtuesit e klubit kuqezi, të cilët janë të kënaqur me punën e tij. Megjithatë, interesimi i Real Madrid mbetet një ofertë që nuk mund të injorohet lehtë, ndaj trajneri pritet ta shqyrtojë seriozisht mundësinë në përfundim të sezonit.

Sipas të përditshmes italiane Tuttosport, Allegri ka vendosur dy kushte kryesore nëse bisedimet me presidentin e Real Madrid, Florentino Perez, do të avancojnë. Kushti i parë lidhet me Luka Modrić. Trajneri italian dëshiron ta ketë kroatin në stafin e tij teknik, jo si futbollist, por si bashkëpunëtor të afërt. Modrić do të shërbente si një figurë kyçe që lidh të kaluarën e lavdishme të klubit me projektin e ri.

Kushti i dytë lidhet me mesfushorin francez Adrien Rabiot. Allegri ka punuar më parë me të te Juventusi dhe e kërkoi edhe te Milani gjatë verës së kaluar. Megjithatë, mbetet për t’u parë se si do të përshtatej Rabiot në mesfushën e Real Madrid, ku tashmë bëjnë pjesë emra si Jude Bellingham, Federico Valverde, Aurélien Tchouaméni, Arda Güler dhe Eduardo Camavinga.

Vendimi përfundimtar pritet të merret pas mbylljes së sezonit, kur Allegri do të vlerësojë seriozisht mundësinë për të drejtuar një nga klubet më të mëdha në botë.