Komisioneri për të Drejtën e Informimit dhe Mbrojtjen e të Dhënave Personale ka vendosur një gjobë të konsiderueshme ndaj kompanisë së ndërtimit “Agi Kons”, në vlerën totale mbi 35 milionë lekë, pas konstatimit të një sërë shkeljesh serioze në mënyrën e përpunimit dhe ruajtjes së të dhënave personale.

Sipas vendimit zyrtar, thuhet se kompania ka publikuar materiale fotografike dhe video të individëve pa siguruar më parë pëlqimin e tyre, duke shkelur parimet bazë të ligjshmërisë dhe transparencës në përpunimin e të dhënave.

Po ashtu, sqarohet se gjatë kontrollit janë evidentuar edhe probleme të tjera strukturore: mungesë kontrate të rregullt me kompaninë “InterMedia”, mungesë dokumentimi të proceseve të përpunimit të të dhënave, si dhe masa të pamjaftueshme teknike dhe organizative për sigurinë e informacionit. Po ashtu, janë konstatuar mungesa të auditimeve.
Në total, masa administrative përbëhet nga dy pjesë: 24 milionë lekë gjobë për shkeljet kryesore që lidhen me mungesën e pëlqimit dhe cenimin e parimeve të përpunimit të të dhënave, si dhe 11.11 milionë lekë të tjera për mangësitë në dokumentim, siguri dhe marrëdhëniet me përpunuesit e jashtëm. Shoqëria administrohet nga Alban Çinari, ndërsa si pronar përfitues rezulton biznesmeni Gentian Sula, përmes strukturës së “UK Development Holding Limited”. Kompania është themeluar fillimisht me aksione të ndara mes Arben Biçokut dhe Gentian Sulës.

Përveç gjobës, “Agi Kons” është urdhëruar të marrë masa korrigjuese, përfshirë sigurimin e pëlqimit të subjekteve për publikimin e të dhënave, rishikimin e kontratës me “InterMedia”, forcimin e masave të sigurisë dhe njoftimin zyrtar të Komisionerit për përgjegjësin e të dhënave.