Seanca e sotme plenare u mbyll pas më shumë se një ore tensionesh dhe sherri fizik mes deputetëve të PD-së dhe atyre të PS-së.

Pasi nisi me tensione që në fillim, kreu i Kuvendit, Niko Peleshi, kaloi direkt në votim për shkak të situatës.

Ndërsa ai lexonte me shpejtësi nenet dhe projektligjet për votim, mazhoranca mbante në duar kartonët jeshilë, ndërsa opozita përmbysi karriget, bllokoi foltoren dhe më pas nisi të hidhte kartonë dhe shishe uji drejt karrigeve të PS-së.

E pranishme në seancë ishte edhe Elisa Spiropali, e cila u tregua thuajse indiferente ndaj gjithë kaosit që ndodhte përreth, duke ndenjur komplet qetësisht në vendin e saj, pa bërë asnjë ndërhyrje.

Përplasja fizike ndodhi mes deputetit të PD-së, Fidel Kreka, dhe ish-ministrit Ervin Hoxha. Mes kaosit, Peleshi ia doli të drejtonte këtë seancë dhe të kalonte për votim të gjitha pikat.