Ka mbrëmje që futbolli nuk i harron. Dhe kjo e 6 tetorit, që për Shqipërinë kalon në orët e para të 7 tetorit 2026, është një prej tyre.

Lionel Messi po luan ndeshjen e fundit me fanellën e Argjentinës, duke i dhënë fund një historie 21-vjeçare me kombëtaren.

Përballë është Benini, në “Monumental” të Buenos Airesit, por rezultati dhe vetë kundërshtari kanë kaluar në plan të dytë. Gjithçka është kthyer në një lamtumirë për numrin 10.

Emocionet nisën që gjatë rrugës drejt stadiumit. Autobusi i Argjentinës u rrethua nga mijëra tifozë me flamuj bardhekaltër, këngë dhe fishekzjarre, ndërsa kamerat kapën Messin duke fshirë lotët dhe duke u përpjekur të përmbante emocionet.

Rreth 85 mijë tifozë pritet të jenë në “Monumental” për natën e fundit të kapitenit, ndërsa AFA e ka konceptuar mbrëmjen si një ceremoni të madhe lamtumire, me koreografi, muzikë, fishekzjarre dhe homazhe të veçanta.

Një nga momentet simbolike pritet të vijë në minutën e 10-të, kur ndeshja do të ndërpritet për pak çaste në nder të Messit dhe fanellës së tij ikonike.

Me këtë ndeshje, Messi e mbyll aventurën ndërkombëtare me 208 paraqitje, 125 gola dhe 68 asistime, sipas të dhënave të publikuara para sfidës.

Historia e tij me Argjentinën ka kaluar nga kritikat te adhurimi absolut.

Pas finales së humbur të Botërorit 2014 dhe disa finaleve të tjera të humbura, Messi madje njoftoi përkohësisht tërheqjen nga kombëtarja në vitin 2016.

Por vitet që pasuan ndryshuan gjithçka.

Copa América 2021, Finalissima 2022, Botërori i Katarit 2022 dhe Copa América 2024 e kthyen Messin në figurën qendrore të një prej periudhave më të suksesshme të kombëtares argjentinase.

Për këtë ndeshje është përgatitur edhe një fanellë speciale me detaje të arta, ndërsa në fushë ndodhen shumë prej lojtarëve që kanë ndarë me të vitet më të mëdha të suksesit.

Edhe Nicolas Otamendi po luan ndeshjen e tij të fundit me Argjentinën.

Mesazhet për Messin kanë ardhur nga e gjithë bota e futbollit, përfshirë Neymar, Rodrigo De Paul dhe Angel Di María.

Messi kishte bërë të qartë më herët se do të largohej nga kombëtarja pas Botërorit 2026, duke thënë se vendimi i dhembte, por se kishte ardhur momenti.

Sonte ajo ditë ka ardhur.

Ndeshja e fundit. Stadiumi i fundit. Fanella e fundit. Përshëndetja e fundit.

Dhe në rrugën drejt “Monumental”, mes mijëra tifozëve që e shoqëronin, Messi nuk mundi t’i mbante lotët.