Marrëveshja e Donald Trump dhe Vladimir Putin për naftën ruse thyen raportin e presidentit amerikan me homologun e Ukrainës, Volodymyr Zelensky.

Kreu i Shtëpisë së Bardhë deklaroi se “është koha që Ukraina të ketë një president të ri”, pas kritikave të Zelenskyt për marrëveshjen e naftës me Rusinë.

Presidenti ukrainas paralajmëroi se një marrëveshje e re për të liruar miliona tonë naftë ruse në SHBA dhe tregjet botërore do t’i siguronte Moskës para për të vazhduar luftën e saj në Ukrainë, duke e quajtur atë një dhuratë të Trump për Presidentin rus, Vladimir Putin.

Duke folur ndërsa po largohej nga Shtëpia e Bardhë, Trump tha se presidenti ukrainas “dëshiron t’i krijojë probleme botës” duke vazhduar të autorizojë sulmet ndaj rafinerive ruse.

“Më mirë të ndalet”, tha Trump përpara se të sugjeronte që Ukraina duhet “të ketë një udhëheqës të ri, që mund të bëjë një marrëveshje”.

“Ai mund të kishte bërë shumë marrëveshje dhe për ndonjë arsye, nuk i bën kurrë”, shtoi Donald Trump.

Presidenti amerikan konfirmoi të premten se ishte arritur një marrëveshje me Moskën për të pezulluar sanksionet mbi eksportet ruse të naftës deri më 7 prill.

Delegacioni i Presidentit ukrainas Zelensky dhe përfaqësuesit e Trump u takuan në Miami, në atë që supozohej të ishin bisedime për të diskutuar mënyrat për të bindur Rusinë që t’i jepte fund luftës. Megjithatë, takimi u ndërpre kur ekipi ukrainas mori lajmin për marrëveshjen e naftës Trump-Putin.

Gjatë takimit, Witkoff dhe Kushner i bënë të ditur gjithashtu Kievit se, nëse vendos të vazhdojë bombardimin e rafinerive ruse, inteligjenca amerikane do të ndalojë së ndari informacion me inteligjencën ukrainase.

Megjithatë, pasi u njoftua marrëveshja Trump-Putin, një zyrtar ukrainas deklaroi se “sulmet do të vazhdojnë”. Ekipi ukrainas vendosi gjithashtu të kthehej në shtëpi dhe të anulonte raundin e dytë të bisedimeve të planifikuara me Shtetet e Bashkuara, të shtunën e 10 tetorit.