Një burrë ka mbetur i plagosur rëndë pasi hyri në hapësirën e rrethuar ku mbahej një tigër në një park zoologjik në Angli.
Ngjarja shkaktoi panik mes vizitorëve, të cilët u detyruan të largoheshin menjëherë nga ambientet e parkut. Sipas Daily Mail, incidenti ndodhi rreth orës 13:30 në parkun e kafshëve të egra Yorkshire Wildlife Park, pranë qytetit Doncaster. Identiteti i burrit nuk është bërë publik.
Sipas raportimeve, ai ishte në gjendje të rënduar emocionale kur hyri në hapësirën ku mbahej tigri, i cili më pas e sulmoi dhe i shkaktoi plagë të rënda.
Pamjet e publikuara në rrjetet sociale tregojnë burrin, i veshur me një bluzë të zezë, të gjunjëzuar në tokë me krahët e hapur. Në një moment, tigri i afrohet nga pas, e kafshon në shpinë dhe e rrëzon përtokë, duke vijuar sulmin. Më pas, tigri qëndron mbi të. Në pamje dëgjohet burri duke bërtitur disa herë: “Ndal!”.
Pas ngjarjes, në vendin e incidentit mbërritën forca të shumta policie, dy ambulanca dhe një helikopter mjekësor. Vizitorët u evakuuan, ndërsa parku u mbyll përkohësisht.
Sipas raportimeve, punonjësit e parkut përdorën fishekë të posaçëm me gaz, me qëllim frikësimin e kafshës dhe largimin e saj nga burri i plagosur.
Dëshmitarët thanë se kishin dëgjuar deri në pesë të shtëna, çka shkaktoi pasiguri fillestare lidhur me fatin e tigrit. Megjithatë, policia konfirmoi më vonë se kafsha kishte mbetur brenda hapësirës së rrethuar edhe pas incidentit.
Vizitorët e parkut u udhëzuan të largoheshin menjëherë pas sulmit. Dominic Ford, i cili ndodhej aty së bashku me mbesën e tij katërvjeçare, tha se punonjësit i kërkuan të largohej nga ambientet.
Sipas tij, stafi u tregua i qetë, pavarësisht seriozitetit të situatës. Ford tha se në vendngjarje mbërriti një helikopter mjekësor, një ambulancë dhe një numër të madh efektivësh policie.
