Nëse ka ndonjë ngadalësim në procesin e integrimit të Shqipërisë në Bashkimin Europian, faji është i opozitës.

Kjo është ajo që mendon kryeministri Edi Rama, i cili në një takim me banorët e Njësisë nr.3 në Tiranë, tha se është shumë e dëmshme kur deputetët e opozitës japin intervista dhe hedhin dyshime nëse Shqipëria është vërtet gati për t’u anëtarësuar.

“Njerëzit që japin intervista në media të huaja dhe komunikojnë me grupe parlamentare, pavarësisht se përfaqësojnë forca opozitare, nuk e kanë idenë se çfarë dëmi bëjnë dhe nuk u intereson fare. Ata nuk lënë gur pa luajtur për të futur dyshimin te Shqipëria dhe te procesi i integrimit”, u shpreh Rama.

Por, sipas tij, Komisioni Europian është i vëmendshëm dhe ndjek çdo gjë, duke mos u lejuar të mashtrohet nga këto deklarata.

“Komisioni Europian ndjek çdo gjë 24 orë, shtatë ditë në javë. Ka një strukturë të organizuar që mbulon çdo fushë dhe nuk gënjehet dot”, tha kryeministri.