Një studim i ri ndërkombëtar ka zbuluar se cilat janë qytetet më të mira në botë për të rritur një familje, duke analizuar faktorë si siguria, hapësirat e gjelbra, arsimi, aktivitetet për fëmijë dhe kostoja e jetesës.
Raporti është realizuar nga platforma financiare Compare the Market, e cila analizoi 50 qytete në mbarë botën dhe i vlerësoi ato sipas nëntë indikatorëve kryesorë, përfshirë nivelin e sigurisë, numrin e parqeve, aktivitetet për fëmijë, shpenzimet për arsim dhe standardin e jetesës.
Sipas këtij studimi, qyteti më i mirë në botë për të rritur një familje është Brisbane në Australi.
Brisbane, qyteti më i mirë për familjet
Brisbane kryeson listën me një rezultat prej 6.457 nga 10, duke u dalluar për numrin e madh të hapësirave të gjelbra dhe zonave rekreative për fëmijë.
Qyteti ka rreth 84.89 parqe dhe kënde lojërash për çdo 100 mijë banorë, një nga shifrat më të larta në botë, duke ofruar shumë mundësi për aktivitete familjare në natyrë.
Gjithashtu, Brisbane ka një nivel të lartë sigurie dhe një cilësi të mirë jetese për familjet me fëmijë.
Londra dhe Auckland në vendet e para
Në vendin e dytë renditet Londra, e cila ofron një numër të madh aktivitetesh për familjet dhe një sistem të zhvilluar social. Megjithatë, një nga disavantazhet kryesore të jetesës në kryeqytetin britanik është kostoja e lartë e jetesës, që për një familje me katër persona arrin mesatarisht mbi 5000 dollarë në muaj.
Në vendin e tretë renditet Auckland në Zelandën e Re, i cili vlerësohet për nivelin e lartë të sigurisë dhe për mundësitë e shumta të aktiviteteve për fëmijë.
Helsinki dhe Sydney plotësojnë pesëshen
Në vendin e katërt renditet Helsinki, kryeqyteti i Finlandës, i njohur për nivelin shumë të lartë të sigurisë dhe investimet në arsim.
Ndërsa vendi i pestë i takon Sydney, një tjetër qytet australian që ofron shumë aktivitete për fëmijë dhe një cilësi të lartë jetese, edhe pse kostoja e jetesës është relativisht e lartë.
Top 5 qytetet më të mira për të rritur një familje
- Brisbane, Australi
- Londër, Mbretëria e Bashkuar
- Auckland, Zelanda e Re
- Helsinki, Finlandë
- Sydney, Australi
Ekspertët theksojnë se faktorë si siguria, arsimi, hapësirat e gjelbra dhe aktivitetet për fëmijë kanë ndikimin më të madh në cilësinë e jetesës për familjet.
