Lëvizje të reja priten në trupën diplomatike shqiptare. Uran Ferizi, aktualisht ambasador i Shqipërisë në Mbretërinë e Bashkuar, pritet të emërohet në krye të Misionit të përhershëm të Shqipërisë pranë OSBE-së.

Sipas informacioneve të bëra publike, Ferizi pritet të zhvillojë më 22 shtator dëgjesën në Komisionin për Europën dhe Punët e Jashtme, si pjesë e procedurës për detyrën e re.

Nëse emërimi finalizohet, ai do të zëvendësojë Eglantina Gjermenin, e cila ka drejtuar deri më tani Misionin e përhershëm të Shqipërisë pranë OSBE-së.

Uran Ferizi mban postin e ambasadorit të Shqipërisë në Mbretërinë e Bashkuar që prej janarit të vitit 2024. Sipas profilit të tij zyrtar diplomatik, ai ka një formim në matematikë, financë dhe kërkim shkencor, me studime dhe eksperiencë profesionale në Britani dhe Shtetet e Bashkuara.

Emërimi i tij në krye të Misionit pranë OSBE-së pritet të jetë një nga lëvizjet e radhës në përfaqësimin diplomatik shqiptar.