Bursa e kriptomonedhave Bitget ka pezulluar përkohësisht tërheqjet e klientëve pasi zbuloi transferta të paautorizuara me vlerë rreth 351.6 milionë dollarë nga disa prej kuletave të saj.

Incidenti u zbulua më 24 shtator, në orën 18:31 UTC, kur sistemet e sigurisë së kompanisë identifikuan lëvizje të dyshimta nga një pjesë e kuletave “hot” dhe “warm”. Bitget aktivizoi menjëherë procedurat e emergjencës dhe nisi hetimet.

Drejtuesja ekzekutive Gracy Chen deklaroi se fondet e përdoruesve mbeten të sigurta dhe se humbja do të mbulohet nga fondi mbrojtës i kompanisë, i cili sipas Bitget kap vlerën mbi 464 milionë dollarë.

“Tërheqjet janë pezulluar përkohësisht si masë sigurie”, ishte mesazhi i kompanisë, ndërsa depozitat dhe tregtimi vazhdojnë normalisht.

Bitget tha gjithashtu se kuletat e ftohta nuk janë prekur dhe se incidenti është kufizuar vetëm në një pjesë të infrastrukturës së saj të kuletave online. Autoritetet dhe kompani të specializuara në sigurinë “on-chain” janë përfshirë në hetim.

Sulmi është një tjetër goditje e madhe për industrinë e kriptomonedhave, e cila prej vitesh përballet me vjedhje të mëdha digjitale dhe transferta që mund të lëvizin me shpejtësi jashtë sistemit financiar tradicional.