Debati në Kuvend për çështjen e Vlora Hysenit ka sjellë replika të forta mes mazhorancës dhe opozitës.

Pas akuzave të kreut të opozitës, Sali Berisha, për zhvillimet në Shërbimin Informativ të Shtetit, fjalën e mori deputeti socialist Blendi Klosi, i cili iu përgjigj me akuza të drejtpërdrejta.

Klosi deklaroi se Berisha ka sulmuar vazhdimisht institucionet e sigurisë dhe krerët e shërbimeve sekrete, ndërsa solli si shembull ish-kreun e SHISH, Bashkim Gazidede.

“Në 22 vite ke drejtuar këtë forcë politike, por nuk ke hequr dorë nga akuzat për çdo institucion dhe krerët e shërbimeve sekrete. E përmende vetë, ke goditur institucionet e sigurisë kombëtare”, tha Klosi.

Ai shtoi se mazhoranca, sipas tij, ka treguar përmes reformës në drejtësi se nuk do të mbrojë askënd përballë hetimeve.

“Ne e kemi diskutuar me fakte me reformën në drejtësi standardin tonë. Ne e kemi vërtetuar se nuk do të mbrojmë askënd në raport me drejtësinë dhe të gjithë do të përballen”, deklaroi deputeti socialist.

Më tej, Klosi e ashpërsoi tonin ndaj Berishës, duke iu referuar Bashkim Gazidedes.

“Shefi i shërbimit tënd, Gazidede, ishte akuzuar për vrasje dhe u bë komandant i FA, duke hapur depot dhe shkatërruar vendin. Sot je non-grata, i akuzuar si kriminel dhe një nga më të korruptuarit e Ballkanit dhe vijoni të dilni këtu. 22 vjet Sali Berisha drejton në opozitë”, u shpreh Klosi.

Deklaratat e Klosit janë pjesë e përplasjes politike në Kuvend dhe përfaqësojnë akuzat e tij ndaj Berishës.