Një 49-vjeçar ka mbetur i plagosur me thikë pas një konflikti në rrugën “Marko Boçari”, ndërsa autori i dyshuar është arrestuar nga Policia.

Sipas njoftimit zyrtar, menjëherë pas marrjes së informacionit se shtetasi K. C., 49 vjeç, ishte dëmtuar me mjet prerës, shërbimet e Policisë shkuan në vendngjarje dhe nisën veprimet për zbardhjen e rrethanave.

Si rezultat i reagimit të shpejtë dhe veprimeve hetimore e operacionale, u identifikua dhe u arrestua shtetasi T. N., 50 vjeç.

Nga hetimet e deritanishme dyshohet se 50-vjeçari ka plagosur 49-vjeçarin pas një konflikti për motive të dobëta.

I dëmtuari ndodhet në spital, nën kujdesin e mjekëve.

Materialet procedurale i janë referuar Prokurorisë për veprime të mëtejshme.