Kryeministri Edi Rama ka reaguar sërish për Zvërnecin.
Në një reagim në rrjete sociale, Rama e cilëson mobilizimin kundër projektit si të paprecedentë, duke theksuar se Shqipëria po synon të ngjitet në “Olimpin e turizmit” me një investim prej 4 miliardë eurosh nga partnerë nga Shtetet e Bashkuara dhe Katari.
Sipas kryeministrit, projekti do të sjellë përfitime ekonomike për vendin, duke përfshirë krijimin e rreth 10 mijë vendeve të punës, rritjen e prodhimit të brendshëm bruto, të ardhurave për frymë, pagave dhe pensioneve, si dhe rritjen e vlerës së pronave dhe zhvillimin e sektorëve të lidhur me turizmin.
Postimi i Ramës
“35 VJET S’E KAM PARË KURRË KËTË MOBILIZIM” , thotë ky shqiptari nga Athina
Eh vëllai im, po normal, sepse për herë të parë në 35 vite Shqipëria po synon Olimpin e turizmit me një projekt marramendës, që nuk e ka askush në këtë anë të botës.
E tani që projektit po i afrohet dita e daljes në dritë, dolën shqiponjat të mbrojnë atdheun nga 4 miliardë Eurot investim të partnerëve amerikanë e katariotë.
Dhe për herë të parë në 35 vjet, mediat greke dhe faqet me miliona ndjekës në Greqi, janë bërë njësh me shqiponjat për të shpëtuar atdheun tonë nga ardhja e hoteleve më prestigjiozë të botës, nga 10 mijë vende pune cilësore, nga rritja e prodhimit të përgjithshëm kombëtar me 4% deri në 2030, rritja e të ardhurave për frymë, rritja e pagave e pensioneve (si në Malin e Zi për shembull, largqoftë), nga rritja e vlerës së pronës së çdo vlonjati e jo vetëm, nga zgjerimi i zinxhirit të vlerës për bujqit, peshkatarët, shoferët e me radhë të gjithë subjektet e lidhura me atë zinxhir, nga personazhet botërore të artit, sportit, modës, biznesit, që mos e dhëntë Zoti do vinin e do flinin, disa edhe do blinin edhe shtëpi në Vlorë…
Po mirë këto, po pse pak është shpëtimi i Shqipërisë nga rritja e mëtejshme e imazhit ndërkombëtar, i cili edhe kaq edhe u teprua shumë, sepse në sytë e botës Shqipëria duhet të jetë mafie, korrupsion, llum.
Prandaj të gjithë shqiponjat në protestë sot, se mbulimin nga media greke e keni të garantuar, dy zogj me një gur dmth
