Përballë reagimeve në rritje, Presidenti i SHBA-së, Donald Trump, duket se ka fshirë një postim të diskutueshëm në Truth Social, ku paraqitej si një figurë e ngjashme me Jezusin.

Imazhi i gjeneruar nga inteligjenca artificiale, që e tregonte Trump duke “shëruar” një burrë të sëmurë në një shtrat spitali, shkaktoi reagime të forta nga të dyja krahët e spektrit politik amerikan, përfshirë edhe nga disa prej mbështetësve të tij më të zjarrtë.

Postimi erdhi vetëm pak orë pasi Trump publikoi një mesazh të gjatë duke kritikuar Papa Leonin XIV, një kritik i hapur i operacioneve ushtarake të SHBA-së dhe Izraelit në Iran.

BBC ka kontaktuar Shtëpinë e Bardhë për sqarime mbi arsyen e fshirjes së postimit.

Imazhi tashmë i fshirë e paraqiste Trump të veshur me një rrobë të bardhë, me dorën që ndriçonte mbi ballin e një të sëmuri – një skenë që kritikët thanë se ngjante me pikturat fetare ku Jezusi shëron të sëmurët.

Në sfond shfaqeshin Statuja e Lirisë, një flamur i madh amerikan që valëvitej, avionë luftarakë dhe një shqiponjë, si edhe një infermiere, një grua duke u lutur dhe një ushtar me uniformë.

Kritikat ndaj imazhit erdhën menjëherë, përfshirë edhe nga figura që konsiderohen pranë Trump dhe administratës së tij.

“Ky postim duhet të fshihet menjëherë,” shkroi Sean Feucht, një aktivist i krishterë që po punon për një seri aktivitetesh fetare për të shënuar 250-vjetorin e Deklaratës së Pavarësisë këtë vit.