Çmimet e naftës kanë shënuar rënie në tregtinë aziatike këtë të martë, pas deklaratave të presidentit amerikan Donald Trump se lufta me Iranin mund të përfundojë së shpejti. Në të njëjtën kohë, të dhënat e fundit sinjalizuan një përmirësim të furnizimit me naftë, pavarësisht ndërprerjeve të shkaktuara nga konflikti në Lindjen e Mesme.
Kontratat e ardhshme të naftës Brent për muajin janar ranë me 1.1%, duke u tregtuar në 91.55 dollarë për fuçi deri në orën 22:41 ET (03:41 GMT). Ndërsa nafta bruto amerikane West Texas Intermediate (WTI) regjistroi një rënie prej 1.3%, duke zbritur në 85.71 dollarë për fuçi.
Gjatë një konference për shtyp në Shtëpinë e Bardhë, Trump deklaroi se pret që lufta me Iranin të përfundojë “shumë shpejt”. Megjithatë, ai theksoi se bllokada detare ndaj Iranit do të mbetet kryesisht në fuqi.
Presidenti amerikan shtoi gjithashtu se nga pikëpamja ushtarake, konflikti me Iranin “ka përfunduar në mënyrë efektive”. Deklaratat e Trump erdhën pas takimit të zhvilluar të hënën me kryeministrin e Katarit, Sheikh Mohammed bin Abdulrahman Al-Thani, ku u diskutua mundësia e arritjes së një marrëveshjeje me Iranin.
Katari ka luajtur një rol të rëndësishëm ndërmjetësues mes Uashingtonit dhe Teheranit. Megjithatë, përpjekjet e fundit diplomatike për arritjen e një marrëveshjeje paqeje nuk kanë dhënë rezultate konkrete.
