Gjykata Themelore në Prishtinë ka shpallur vendimin për një nga rastet më të rënda kriminale në Kosovë, duke dënuar me burgim të përjetshëm Naim Murseli dhe Granit Plava për vrasjen e Liridona Ademaj, ngjarje e ndodhur në nëntor 2023.
Ndërkohë, i akuzuari tjetër, Kushtrim Kokalla, është dënuar me 30 vite burgim për përfshirjen e tij në këtë çështje.Vendimi u bë publik nga kryetarja e trupit gjykues, Fatmire Dërmaku, pas një procesi gjyqësor të ndjekur me vëmendje të madhe publike.Sipas aktakuzës, vrasja ishte e planifikuar dhe kishte si motiv përfitimin financiar nga një sigurim jetësor në Suedi, në vlerë rreth 260 mijë euro. Prokurorja e çështjes, Javorka Përlinçeviq, kishte kërkuar burgim të përjetshëm për të tre të akuzuarit, duke e cilësuar krimin si të organizuar.Ngjarja ndodhi më 29 nëntor 2023, në fshatin Bërnicë, ku viktima u qëllua ndërsa ndodhej në veturë me bashkëshortin dhe dy fëmijët e tyre.Sipas hetimeve, Naim Murseli dyshohet se kishte organizuar vrasjen, ndërsa Kushtrim Kokalla kishte ndërmjetësuar kontaktin me Granit Plava, i konsideruar si autori i drejtpërdrejtë.Gjatë procesit, të akuzuarit kanë dhënë versione të ndryshme për ngjarjen, duke mohuar përgjegjësinë ose duke kundërshtuar akuzat.
