Zhvillime të reja pas transferimit të kryebashkiakut të Tiranës, Erion Veliaj, nga burgu i Durrësit në atë të Fierit. Ministri i Drejtësisë Toni Gogu, ka urdhëruar nisjen e një inspektimi për 24 transferime të të burgosurve, të kryera gjatë periudhës 16-27 tetor. Mes rasteve që do të kalojnë në kontroll është edhe transferimi i Erion Veliajt, një vendim që ka shkaktuar reagime dhe debate të forta gjatë ditëve të fundit.

Anila Hoxha raporton se inspektimi i urdhëruar nga ministri Gogu do të përfshijë edhe lëvizjen e kryebashkiakut nga institucioni i paraburgimit në Durrës drejt atij në Fier. Drejtoria e Përgjithshme e Burgjeve ka bërë të ditur më herët se gjatë këtyre 11 ditëve janë kryer gjithsej 24 transferime.

Tashmë, këto lëvizje do t’i nënshtrohen verifikimit nga Ministria e Drejtësisë, përfshirë edhe vendimin për Veliajn. Ende nuk dihet nëse inspektimi do të evidentojë shkelje në procedurat e ndjekura për transferimin e kryebashkiakut të Tiranës.