Partia Socialiste ka mbledhur paraditen e sotme Grupin Parlamentar, ku në fokus të diskutimeve do të jetë punë në terren me qytetarët, në kuadër të turit “Punët e Shqipërisë”.

I pranishëm në këtë mbledhje është edhe kryeministri Rama, i cili në mbledhjen e kaluar u la porosi deputetëve dhe ministrave që të jenë më afër me qytetarët.

Ndërkohë, pritet me interes nëse Grupi Parlamentar i PS-së do të marrë ndonjë masë për Elisa Spiropalin, e cila ka dalë hapur kundër asaj që po ndodh brenda Partisë Socialiste.

Në reagimin e parë pas debateve me Ramën, Spiropali tha se ajo që po ndodh brenda PS-së është  shfaqje e një modeli që po zgjerohet me një normalitet të heshtur, ku arroganca dhe abuzimi nuk paraqiten më si devijime, por si forma të pranueshme shoqërore.

Sipas saj, ky model nuk imponon vetëm vendime, por ndërton një kulturë ku bindja konsiderohet virtyt dhe përshtatja shpërblehet më shumë se merita, duke e zhvendosur gradualisht politikën nga një hapësirë e konkurrencës së ideve në një strukturë të mbyllur ku rëndësi ka sa përshtatesh, jo sa vlen.

“Ajo që po ndodh nuk është thjesht një çështje personale, por një shfaqje e një modeli që po zgjerohet me një normalitet të heshtur, ku arroganca dhe abuzimi nuk paraqiten më si devijime, por si forma të pranueshme shoqërore.

Ky model nuk imponon vetëm vendime, por ndërton një kulturë ku bindja konsiderohet virtyt dhe përshtatja shpërblehet më shumë se merita, duke e zhvendosur gradualisht politikën nga një hapësirë e konkurrencës së ideve në një strukturë të mbyllur ku rëndësi ka sa përshtatesh, jo sa vlen”, shkruante Spiropali ndër të tjera.