Eshtë e qartë se protestat e studentëve dhe të rinisë po çojnë në krizë të rëndë dhe deri në paralizim të vendit. Sot në ditën e tretë, shkollat nuk funksionojnë, transporti ka probleme, bankat po lajmërohet se kanë mbyllur filiale. Eshtë e qartë se ky reduktim shërbimesh mund të zmadhohet. Përgjigja që po vjen nga qeveria, është policia dhe ajo që duhet të jetë, politika.

Ky moment nuk menaxhohet dot me forca speciale, edhe sikur të gjithë trupat e Shqipërisë t’i sjellësh në Tiranë. Albania Today, ka vëzhguar lëvizjet e studentëve dhe duket qartë se prania e uniformave blu vetëm përshkallëzon situatën, sjell irritim dhe skena dhune.

Nga ky moment i vështirë dilet vetëm me politikë. Sa më shumë të vonojë ky reflektim, aq më e vështirë do të jetë, aq më të rënda pasojat.

Revolta ka shpërthyer prej akumulimit të gjatë në disa vite të shumë skandaleve dhe padrejtësive. Për qeverinë që i janë dhënë aq shumë të drejta e mandate, aq shumë privilegje, nuk është aspak sakrificë që të mendojë të tërhiqet, të lëshojë pe. Nuk dihet pse ende është në detyrë Ministrja e Arsimit. Largimi i asaj do të ishte një sinjal se zëri i studentëve po dëgjohet, do të ishte një valvul shkarkimi.

Më tej, kjo hap një koridor për një zgjidhje më të madhe. Por e gjitha, bëhet vetëm me politikë. Po të dëgjosh studentët kur shprehen para kamerave, kupton se ata janë mjaft të ditur e të maturuar për t’u manipuluar, dhe po ashtu mjaft të vendosur për t’u frikësuar me mjete policore. Duhet politikë, jo polici.