Kryeministri Rama, ora 13:00 mbërrin nga New York, burime qeveritare tregojnë se çfarë pritet të deklarojë nga salla VIP në Rinas.

Njoftimi i Kryeministrit Edi Rama për t’ju drejtuar me një mesazh shqiptarëve nga salla e shtypit të Aeroportit “Nënë Tereza”, sapo të mbërrijë nga New York, ka prodhuar një mori hamendësimesh dhe aludimesh.

Mbetet ende e paqartë përmbajtja e deklaratës që kryeministri Edi Rama pritet të bëjë pas kthimit nga Shtetet e Bashkuara.

Një burim qeveritar, i cili ka qenë me kryeministrin gjatë vizitës në SHBA, ka bërë me dije se deklarata do të lidhet me situatën aktuale në vend.

Burimi nuk ka dhënë detaje të tjera mbi përmbajtjen e qëndrimit që pritet të mbajë Rama, duke lënë të hapur tematikën e deklaratës së tij.

Nuk përjashtohet mundësia që kryeministri të flasë për mënyrën e zgjedhur nga prokurorët e SPAK në marrjen si të pandehur të ish-shefes së SHISH, Vlora Hyseni, kur ajo ishte jashtë vendit, sikurse vetë kryeministri ishte në SHBA për të marrë pjesë në Asamblenë e Përgjithshme të OKB-së.