Një juri në Los Anxhelos ka dhënë një fitore të paprecedentë për një të re që paditi Meta dhe Google për varësinë e saj nga rrjetet sociale gjatë fëmijërisë.

Një panel jurie vendosi se Meta dhe Google kanë ndërtuar qëllimisht platforma të rrjeteve sociale që krijojnë varësi dhe që kanë dëmtuar shëndetin mendor të një 20-vjeçareje, e njohur si Kaley.

Ky vendim pritet të ndikojë në qindra raste të ngjashme që aktualisht po shqyrtohen në gjykatat amerikane.

Avokatët e Metës argumentuan se, edhe pse Kaley ka pasur vështirësi në jetën e saj, përdorimi i Instagramit, që është në pronësi të Metës së bashku me Facebook dhe WhatsApp, nuk e ka shkaktuar ose kontribuar ndjeshëm në ato probleme.

Pas një gjykimi që zgjati rreth pesë javë, juria vendosi se Meta është 70% përgjegjëse për dëmin e paditëses, ndërsa YouTube është 30% përgjegjës.

Në një deklaratë, Meta tha:

“Ne nuk pajtohemi me vendimin dhe po shqyrtojmë opsionet tona ligjore.”

Gjatë paraqitjes së tij të parë ndonjëherë para një jurie në shkurt, kryetari dhe drejtori ekzekutiv i Metës, Mark Zuckerberg, u mbështet në politikën afatgjatë të kompanisë për të mos lejuar përdorues nën moshën 13 vjeç në platformat e saj.

Kur iu paraqitën kërkime dhe dokumente të brendshme që tregonin se Meta e dinte se fëmijë të vegjël po përdornin platformat e saj, Zuckerberg tha se kishte “dëshiruar gjithmonë” për progres më të shpejtë në identifikimin e përdoruesve nën 13 vjeç. Ai këmbënguli se kompania kishte arritur “në një pikë të duhur me kalimin e kohës”.

Ndërsa Google, si pronar i YouTube, ishte gjithashtu i pandehur në këtë rast, shumica e procesit gjyqësor u përqendrua te Instagram dhe META.

Snap dhe TikTok ishin gjithashtu fillimisht të pandehur, por të dy kompanitë arritën marrëveshje të fshehta me Kaley para gjyqit.