Më shumë se 500 nëna dhe foshnje kanë vdekur ose kanë pësuar dëmtime serioze për shkak të dështimeve sistemike në shërbimet e maternitetit të Shërbimit Shëndetësor Kombëtar (NHS) në Britaninë e Madhe, sipas hetimit më të madh të kryer ndonjëherë në vend.

Raporti prej 401 faqesh, i cili shqyrtoi rastet e rreth 2,500 familjeve përgjatë më shumë se një dekade në NHS Trust të Spitaleve Universitare të Nottinghamit, zbuloi mungesa kronike të stafit, menaxhim të dobët dhe trajnim të pamjaftueshëm të personelit.

Sipas gjetjeve, 444 gra dhe 76 foshnje pësuan dëmtime “potencialisht të parandalueshme” si pasojë e kujdesit të dobët në Qendrën Mjekësore të Mbretëreshës dhe Spitalin e Qytetit të Nottinghamit. Hetimi evidentoi gjithashtu të paktën 156 raste të vdekjeve të foshnjave dhe gjashtë vdekje të nënave.

Raporti përshkruan një “kulturë toksike ngacmimi”, ku drejtues të caktuar akuzohen se kanë ushtruar presion dhe frikësim ndaj stafit dhe pacientëve. Gjithashtu u konstatua se shqetësimet e nënave shpesh nuk merreshin seriozisht dhe se ankesat për keqtrajtim mbeteshin pa hetim për vite me radhë.

Mes rasteve më tronditëse të dokumentuara janë ato të foshnjave të trajtuara në mënyrë të papërshtatshme pas vdekjes. Një foshnjë u vendos në morg pranë trupit të një të rrituri të panjohur, ndërsa një tjetër u etiketua gabimisht si “mbeturinë klinike”. Në një rast tjetër, një familjeje iu dërguan aksidentalisht fotografi nga autopsia e foshnjës së tyre.

Raporti zbulon gjithashtu se një nënë që humbi jetën gjatë lindjes në vitin 2021 nuk mundi të përcillej nga familjarët, pasi trupi i saj ishte ruajtur në mënyrë të papërshtatshme, duke pësuar dëmtime të rënda.

Sipas hetimit, rreth 40% e stafit raportuan se kishin përjetuar ngacmime në vendin e punës, ndërsa shumë punonjës u larguan për shkak të një kulture heshtjeje dhe mungesës së mbështetjes. Gratë nga komunitetet minoritare u përballën me diskriminim, ndërsa mungesa e komunikimit ndikoi veçanërisht tek pacientet që nuk flisnin anglisht.

Raporti evidenton se problemet ishin të njohura që nga viti 2010, por nuk u adresuan në mënyrë efektive nga drejtuesit e sistemit shëndetësor.

Ndërkohë, dy persona të moshës 55 dhe 59 vjeç janë arrestuar në kuadër të një hetimi mbi funksionimin e morgut, ndërsa spitali ka paguar tashmë kompensime dhe gjoba për shkeljet e konstatuara. Edhe Këshilli i Infermierisë dhe Mamisë po heton dhjetëra raste që lidhen me përgjegjësinë profesionale të stafit.

Raporti kërkon reforma të menjëhershme, rritje të përgjegjshmërisë dhe vendosjen e mekanizmave të rinj të sigurisë për pacientët, me qëllim shmangien e tragjedive të ngjashme në të ardhmen.