Të paktën 14 persona humbën jetën dhe pesë të tjerë mbetën të plagosur pasi një kamionetë doli nga rruga dhe ra në një humnerë në veri të Perusë, njoftuan autoritetet lokale.

Sipas zyrtarit të komunës së San Juan, Ricardo Chillon, aksidenti ndodhi në zonën Ciudad de Dios, rreth 800 kilometra në veri të Limës.

“Nga ky aksident janë regjistruar 14 viktima dhe pesë të plagosur, pasi automjeti ra nga një shkëmb,” tha Chillon për AFP.

Në automjet ndodheshin 19 pasagjerë, ndërsa mes viktimave janë edhe shoferi i kamionetës dhe një fëmijë.

Autoritetet po hetojnë shkaqet e aksidentit, ndërsa të plagosurit janë transportuar në spital për të marrë ndihmën mjekësore.

Aksidentet rrugore janë të shpeshta në Peru për shkak të gjendjes së dobët të infrastrukturës rrugore, mungesës së kontrolleve, shpejtësisë së lartë dhe faktorëve të tjerë që ndikojnë në sigurinë e qarkullimit.

Sipas të dhënave zyrtare, më shumë se 3.000 persona humbën jetën në aksidente rrugore në Peru gjatë vitit të kaluar.