Behgjet Pacolli ka konfirmuar në një shënim të faqen e tij në Facebook, se përfundimisht çështja e Aeroportit të Vlorës, është në arbitrazh.

Ai thotë se kjo po bëhet kundër dëshirës së tij dhe se prej një viti është në bisedime që çështja të zgjidhet, që mosmarrëveshjet të sheshohen, punimet të përfundojnë dhe Aeroporti të jetë gati.

Mirëpo, tani i është drejtuar drejtësisë ndërkombëtare.

Në reagime të mëparshme, kompania e Pacollit ka bërë të ditur se vetëm fatura punimesh janë mbi 300 milionë euro. Pa shtuar këtu kostot për dëmet e shkaktuara, për vonesat dhe për shpenzimet gjyqësore.

Më herët, ka pasur raportime që shuma që mund të kërkojë Pacolli në Arbitrazh, për prishjen e njëanshme të kontratës, për heqjen e pronësisë në Aeroportin e Vlorës, pritet të shkojë rreth 500 milionë euro.

Nisur nga disa debate mes ortakëve, qeveria ndërhyri në këtë koncesion në prag të përfundimit të punimeve dhe vendosi ta largojë Pacollin.

Në një reagim këtë pasdite, sipërmarrësi i njohur shprehet se i vjen keq që kompensimin e këtij dëmi do ta paguajnë qytetarët shqiptarë, dhe jo shkaktarët, jo fajtorët e këtij konflikti. Fajtorët nuk i ka përmendur me emër, por më parë ka lënë të kuptohet se ata janë Belinda Balluku dhe Edi Rama.

Nëse arbitrazhi do të vendosë në favor të Pacollit, kjo do të ishte gjoba më e madhe deri tani që qytetarët shqiptarë do të paguajnë për një kontratë të prishur në mënyrë të njëanshme nga qeveria.