Presidentja e Komisionit Evropian, Ursula von der Leyen, do të nisë nesër një tur në Ballkan, me Tiranën si ndalesën e parë.

Gjatë vizitës në Shqipëri, Von der Leyen do të zhvillojë takime me presidentin Bajram Begaj dhe kryeministrin Edi Rama.

Më 1 tetor, presidentja e Komisionit Evropian do të vijojë turin në Kosovë, ku pritet të takohet me presidenten në detyrë, Albulena Haxhiun, dhe kryeministrin Albin Kurti.

Po të njëjtën ditë, Von der Leyen do të udhëtojë drejt Malit të Zi, ku do të zhvillojë takime me presidentin Jakov Milatović dhe kryeministrin Milojko Spajić.

Turneu do të përmbyllet të premten në Maqedoninë e Veriut, me takime me presidenten Gordana Siljanovska-Davkova dhe kryeministrin Hristijan Mickoski.

Sipas njoftimit, Serbia dhe Bosnje-Hercegovina nuk janë përfshirë në itinerarin e këtij turi, për shkak të zgjedhjeve të ardhshme që do të zhvillohen në këto dy vende.

Vizita e Von der Leyen lidhet edhe me një plan të ri për vendet që synojnë avancimin drejt anëtarësimit në Bashkimin Evropian.

Plani parashikon një udhërrëfyes të posaçëm për Shqipërinë, Malin e Zi, Moldavinë dhe Ukrainën, me reforma prioritare, afate orientuese dhe objektiva për përfundimin e fazave të negociatave.

Në të njëjtën kohë, edhe vendet anëtare të Bashkimit Evropian pritet të kenë angazhime konkrete për avancimin e procesit.

Megjithatë, vendimet kyçe në procesin e zgjerimit vazhdojnë të kërkojnë miratim unanim nga vendet anëtare të BE-së.