Gjykata e Vlorës ka caktuar masën e sigurisë “arrest në burg” për Granit Pepnikën, i arrestuar pak ditë më parë në Dhërmi nën dyshimet për veprën penale të mashtrimit kompjuterik.

E njëjta masë është dhënë edhe për Xhoni Hitajn, i akuzuar për të njëjtën vepër penale, si dhe për Redion Rexhmatin, ndaj të cilit rëndon akuza për “përkrahje të autorit të krimit”.

Tre të dyshuarit u arrestuan gjatë një operacioni policor në Dhërmi. Gjatë kontrollit në vilën ku qëndronin, efektivët sekuestruan një armë zjarri pistoletë dhe një sasi lënde narkotike të dyshuar cannabis sativa.

Sipas hetimeve, Granit Pepnika dyshohet se drejtonte një skemë të organizuar mashtrimi online, e cila u ka shkaktuar viktimave dëme financiare që vlerësohen në rreth 50 milionë euro.

Hetuesit bëjnë me dije se skema funksiononte përmes call center-ave të organizuar, ku operatorët kontaktonin qytetarë nga vende të ndryshme të Europës duke u prezantuar si këshilltarë financiarë ose përfaqësues të platformave të investimit. Viktimat josheshin përmes faqeve të rreme me premtime për fitime të shpejta nga bursat, kriptovalutat dhe tregjet financiare, ndërsa autorët dyshohet se përdornin identitete dhe profile të fabrikuara për të fituar besimin e tyre.

Hetimet për dokumentimin e plotë të aktivitetit kriminal dhe identifikimin e personave të tjerë të përfshirë vijojnë.