Gara për postin e Drejtorit të Përgjithshëm të Policisë së Shtetit ka hyrë në fazën vendimtare, me tre kandidatët që kryesojnë listën: Tonin Vocaj, Lorenc Panganika dhe Skënder Hitaj.
Lista finale i është dërguar kryeministrit nga ministri i Brendshëm, ndërsa vendimi përfundimtar për drejtuesin e ri të Policisë së Shtetit i takon kreut të qeverisë. Pritet që zgjidhja të bëhet brenda javës, duke përmbyllur një proces konkurimi ku morën pjesë 14 kandidatë.
Ekspertët e fushës vlerësojnë se të tre finalistët kanë eksperiencë dhe integritet profesional, duke e bërë përballjen mes tyre mjaft të fortë. Cilido që të emërohet, do të përballet me sfida të rëndësishme, duke përfshirë reformimin e strukturave dhe goditjen e ndikimit të rrjeteve kriminale që kanë depërtuar në disa segmente të policisë gjatë drejtimit të Ilir Prodës.
