Atentati i dyshuar në një lokal të njohur të Elbasanit, pamjet filmike dhe dëshmitë po ndihmojnë hetuesit në rindërtimin e ngjarjes

Detaje të reja dalin në dritë lidhur me incidentin e rëndë me armë zjarri të regjistruar mesditën e kësaj të shtune në një lokal të njohur në qytetin e Elbasanit.

Ngjarja, e cila për pak mund të kishte përfunduar me pasoja tragjike, dyshohet se ka ndodhur rreth orës 14:50 dhe ka përfshirë një shtetas, ndaj të cilit është drejtuar një armë zjarri në një moment kur ai po largohej nga ambientet e lokalit.

Sipas të dhënave paraprake të policisë të siguruara nga dëshmitë e personave të pranishëm dhe pamjet e kamerave të sigurisë, hetuesit kanë mundur të rindërtojnë dinamikën e ngjarjes, para dhe gjatë përplasjes.

Në pamjet filmike shfaqet një person me bluzë të zezë, i identifikuar si Ermir Bitoci, i cili fillimisht ndodhej brenda lokalit.

Bitoci qëndron për disa momente në ambientet e brendshme dhe më pas ngrihet nga tavolina për t’u larguar.

Por lëvizjet e tij duket se janë ndjekur nga një tjetër person, i cili në atë moment ndodhej gjithashtu në lokal, duke konsumuar kafe në shoqërinë e një shtetaseje.

Menjëherë pasi Bitoci ngrihet dhe del jashtë, edhe personi tjetër largohet nga lokali dhe e ndjek nga pas.

Pamjet e kamerave tregojnë se, jashtë ambientit të lokalit, personi me bluzë të bardhë i afrohet nga pas Bitocit dhe i vendos një armë zjarri në pjesën e pasme të kokës. Reagimi i shpejtë i objektivit të atentatit mund të ketë shmangur tragjedinë. Në këtë moment, situata merr një tjetër drejtim.

Sipas të dhënave paraprake, Bitoci ka reaguar menjëherë dhe ka arritur të largohet me shpejtësi nga vendi i ngjarjes.

Një tjetër element që po verifikohet nga grupi hetimor është dyshimi se arma tip pistoletë e personit që e kërcënoi është bllokuar në momentin kur ai ka tentuar të qëllojë.

Nëse kjo rrethanë konfirmohet nga ekspertiza balistike, ajo mund të jetë një prej elementeve kyçe të hetimit për të përcaktuar nëse kemi të bëjmë me një tentativë të drejtpërdrejtë vrasjeje.

Hetuesit po mbështeten në dëshmitë e personave që ndodheshin në lokal, por edhe në pamjet e kamerave të sigurisë, të cilat kanë regjistruar lëvizjet e personave të përfshirë para, gjatë dhe pas incidentit.

Deri tani, motivi mbetet i paqartë dhe pritet të jetë një prej pikave kryesore të hetimit.

Emri i Ermir Bitocit nuk është i panjohur në zonën e Elbasanit. Sipas të dhënave të publikuara dhe informacioneve që qarkullojnë prej vitesh, emri i tij është përmendur në lidhje me episode të periudhës së trazuar të viteve 1997–2000. Më pas ai më së shumti ka jetuar jashtë.